مقال رائع عن شريف اكرامى

شريف اكرامى


خدعوك فقالوا دفاع الاهلى من صنع اكرامي 
الرد على “اصل إكرامي قدامه دفاع قوي” !
مش عارف ليه الإنصاف شئ صعب بالنسبة لبعض الناس، اية المشكلة لما الراجل يجيد تديله حقه، ولما يغلط تنتقده وتهاجمه كمان لو تطلب الأمر!

قبل أي شئ فلو حد ميعرفش رأيي السابق في شريف، فكان رأيي إنه “حارس بالوراثة” وعمري ما اقتنعت إنه حارس مرمي اساسا قبل الموسم الحالي. تمام كدا؟

دا انا كمان كنت بقول -السنة اللي فاتت- إن نظافة الشباكة مش معيار لتقيم حارس المرمي فقط، لإن الدفاع مشارك في الإنجاز دا ودي حقيقة، لكن ليه كنت بقول كدا؟ لإن شريف كان ملوش فضل تقريبا في الموضوع وقتها، لإنه لما كان بيروح عليه فرصة او اتنين كانوا بيتحولوا لأهداف، ووقتها محبيه-المتطرفين تماما ككارهيه حاليا- كانوا بيقولوا “ماهو هيعمل اية يعني .. دي انفرادات .. ومش كل كورة هيصدها” وحاولت اقنعهم مرارا إن “حارس الفريق الكبير بتروح عليه فرص قليلة والطبيعي إنه يتصدي لمعظمها عكس حارس الفريق الضعيف اللي هتروح عليه 20 فرصة فهيصد 18 ويدخل فيه 2 والناس هتعتبره رجل المباراة وشال فريقه!”.

ولإننا فريق كبير لازم حارسنا يكون كبير، ودا اللي الراجل قدمه الموسم دا، تعالوا كدا نشوف الـ9 اهداف اللي سجلهم الخصوم في مرماه:
هدفين من ضربتين جزاء (وادي دجلة – المقاصة)
هدفين من فاولين علي حدود المنطقة (الاتحاد – الشرقية)
هدفين من ركنيتين (الإنتاج – الطلائع) 
3 اهداف من اللعب المفتوح (الاتحاد – المصري – المقاصة)

بديهي طبعا إن الكرات الثابتة مش هنحمله مسئوليتها باستثناء هدف الشرقية لإن تقدمه غير المحسوب وقت تنفيذ الفاول كان سبب رئيسي في عدم تصديه للرأسية اللي جا منها الهدف، ونفس الكلام ينطبق علي هدف انتوي للمقاصة وخروج غير موفق تاني.

يعني من أصل 9 اهداف، هدفين فقط أخطأ فيهم وكان مسئول بشكل ما عنهم، وطبعا متنساش انه تصدى لضربتين جزاء.

للأسف انا مملكش احصائيات خاصة بالاداء التفصيلي لشريف، لكن اللي متأكد منه إن نسبه تصديه للفرص (عدد الأهداف ÷ عدد الفرص) السنة دي اعلي كتير -وبشكل لا يقارن- مع الموسم السابق مثلا، وهو دا سبب انتقادي له السنة اللي فاتت ودفاعي عنه السنة دي، المبدأ متغيرش، فعلا محدش يقدر ينكر دور الدفاع -واسلوب البدري ككل لإن الدفاع مش بس 4 مدافعين- في ارقام شريف للموسم الحالي، لكن الراجل اجاد في دوره ونجح في معظم الاختبارات بكفاءة، فليه الهجوم والتقليل منه؟

علي فكرة انا مش شايف أي حرج في أنك تغير رأيك، بالعكس بشوفه شئ صحي ومطلوب، أنت -المفروض- مبتقولش أرائك بناء علي انطباعات شخصية، لكن بناء علي الاداء في الملعب، واداء شريف بيقول إنه أفضل حارس في مصر وبفارق كبير عن أي حارس تاني ، فليه متدعموش وتشجعه؟ صدقني الهجوم علي طول الخط عمره ما كان مفيد لو كنت شايف إنك كدا الأهلاوي العميق اللي متخدعوش ارقام، يا اخي دا ربنا بيقول “لا تبخسوا الناس أشياءهم” حتي لو مبتحبش شريف أسكت عنه، مبقولش اشكر فيه لو هتعتبر ان الشكر في لاعب فريقك اللي يستحق الاشادة “تطبيل ودروشة” لكن علي الأقل متبقاش دايما بتهاجم وخلاص .

اخيرا: اتمني لو حد يقدر يوصل لشريف ولمدربه إنه محتاج شغل كبير في الكرات العرضية وتوقيت خروجه من مرماه، عشان واضح انه مش بيتدرب عليهم كما يجب، دول نقطتين الضعف اللي بلاحظهم جدا في شريف حاليا وموضوع التوقيت بالذات بيتكرر كتير، وياريت زي ما شريف راااائع جدا ولبق في حديثه الإعلامي (وإن شاء الله يكون له مستقبل كبير في الأهلي بعد اعتزاله في المجال دا)، ياريت يكون قائد جيد لدفاعه ويكلمهم باستمرار (والنقطة دي هتعالج مسألة التوقيت لما يتفاهم مع دفاعه).

Leave a Reply

Your email address will not be published. Required fields are marked *